ភ្នំពេញ៖ លោកអភិបាលរងរាជធានីភ្នំពេញ ចំនួន ២រូប គឺលោក កើត ឆែ និងលោក មាន ចាន់យ៉ាដា ត្រូវបានព្រះមហាក្សត្រដំឡើងឋានៈស្មើនឹងរដ្ឋលេខាធិការបន្ថែមលើមុខងារបច្ចុប្បន្ន។ នេះបើតាមព្រះរាជក្រឹត្យរបស់ព្រះមហាក្សត្រដែលបានឡាយព្រះហត្ថលេខានៅថ្ងៃទី២៦ ខែវិច្ឆិកា ឆ្នាំ២០២២ តែទើបតែចេញផ្សាយនៅព្រឹកថ្ងៃទី២៨ ខែវិច្ឆិកា ឆ្នាំ២០២២។
គូសបញ្ជាក់ថា លោក កើត ឆែ ត្រូវបានរាជរដ្ឋាភិបាលតែងតាំងជាអភិបាលរងរាជធានីភ្នំពេញនៅថ្ងៃទី០៥ ខែកុម្ភៈ ឆ្នាំ២០២១ សម្រាប់អណតិ្តទី២។ មុនលោកក្លាយជាអភិបាលរងរាជធានីភ្នំពេញ កាលពីមុនលោកជាអតីតអភិបាលរងខេត្តពោធិ៍សាត់។
សម្រាប់លោក មាន ចាន់យ៉ាដា កាន់តំណែងជាអភិបាលរងរាជធានីភ្នំពេញតាំងពីឆ្នាំ២០១៦។ បច្ចុប្បន្ន លោក ឃួង ស្រេង ជាអភិបាលរាជធានីភ្នំពេញ និងមានអភិបាលរងរាជធានីភ្នំពេញចំនួន ១០រូបទៀត ក្នុងនោះមាន លោក កើត ឆែ, លោក មាន ចាន់យ៉ាដា, លោក ហួត ហៃ, លោកស្រី កែវ សុខពិសី, លោក ស៊ុយ សេរិទ្ធ, លោក នួន ផារ័ត្ន, លោក ឃ្លាំង ហួត លោក សុខ ពេញវុធ, លោក ហ៊ុន សុរិទ្ធី និងលោក អ៊ីមរ៉ន ហាស្សាន់៕